لم تعد السيارة من الكماليات أو مظاهر الرفاهية، بل أصبحت ضرورة قصوى للمواطن المصرى، فى ظل سوء حالة المواصلات العامة والخاصة والزحام الشديد، والكل يسعى الآن إلى شراء سيارة تعينه على التغلب على هذه المشقة والتنقل من مكان إلى آخر بهدوء وحرية.

ولأن ثمن السيارات ليس صغيراً، فإن اتخاذ قرار الشراء يحتاج دراسة عميقة للاحتياجات والمبلغ المتوفر، خصوصاً إذا كان الأمر يتعلق بسيارة مستعملة، فهذا يستوجب بعض الخطوات للتأكد من سلامة وصلاحية هذه السيارة حتى تكون متأكداً من أنك دفعت أموالك فى سيارة تستحق ثمنها بالفعل، لأنك غالباً بعد أن تشترى سيارة مستعملة وتكتشف أن بها عيوباً لا يمكن أن تعيدها لأن عملية البيع تتم غالباً بدون أى ضمان، وحتى لا تضيع فلوسك أو تحويشة العمر فعليك أن تقرأ جيداً هذه النصائح لعلها تساعدك على شراء سيارة بطريقة صحيحة:

شراء سيارة مستعملة خارج مصر :



1- هل تم شراء السيارة عن طريق الوكيل أم سيارة مستوردة خارج التوكيل؟

2- يجب التأكد من إجراء صيانة السيارة فى التوكيل بصفة دورية.

3- الكشف على السيارة فى التوكيل خصوصاً الموتور وتحديد حالة المحرك بالنسبة المئوية، ووضع تقرير عن حالتها.

4- التأكد من حالة الشاسيه وجسم السيارة.

5- فحص السيارة جيداً للتأكد من عدم تعرضها لحوادث من قبل.

6- التأكد من رقم الكيلومتر الموجود فى عداد التابلوه.

7- الكشف على جسم السيارة من الداخل: حوض المحرك والشنطة والقوائم والأبواب.

8- الكشف على صالون السيارة: حالة الكراسى، فرش الأبواب، حالة التابلوه، الزجاج، المرايا، العدادات، فتحة السقف، الكاسيت، التكييف.

9- التجربة العملية للعفشة للتأكد من: حالة المحرك، صندوق التروس، الدبرياج، والفرامل

10- التأكد من عدم وجود أصوات أشياء مفككة.

11- الكشف على الأنوار والإشارات.

12- الكشف على الكاوتش لمعرفة حالته وتاريخ انتهاء صلاحيته.

13- التأكد من رخصة السيارة ومقارنتها برقم الشاسيه ورقم الموتور.

14- أخيراً، تحديد القيمة حسب سنة الصنع، الموديل، الشكل، وحالة الموتور، بالرجوع إلى متخصص على دراية بأسعار السوق.

شراء سيارة مستعملة داخل مصر :
النهاردة الجمعة و دة الموسم الاسبوعى لشراء العربيات سواء كانت من اعلانات فى الجرائد او نزول السوق .. و لقيت فى كذا موضوع و استفسارات و اسئلة من المقبلين على الشراء و خصوصاً فى العربيات المستعملة اد اية الحيرة و القلق اللى بيبقى فيها و هو نازل يشترى العربية ..و بيقع بين ميكانيكى قد يكون فى اغلب الاحوال متواطىء مع البائع او يكون لة امل فى تخليص مصلحة او انتظار شغلاناتك اللى جاية معاة .. او صديق بيحاول بساعدك و لكن خبرتة لا تكفى للمساعدة .

هحاول اشرح فى الخطوات اللى جاية ان شاء الله .. ازاى تشترى عربية مستعملة و انت لوحدك بدون مساعدة احد أو على الاقل تبقى فاهم و لديك انطباعك و خبرتك الذاتية مهما كان معك احد يحاول التاثير عليك 

ملحوظات هامة :
1-هذا الكلام مناسب للسيارت من التسعينات و حتى الآن و ليس قبل ذلك 
2-هذا الكلام موجة للمبتدئين فى شراء العربيات المستعملة وذلك بغرض الامتلاك فقط و الاستمرار مدة كبيرة بالعربية و اختيار افضل عربية بأحسن سعر ممكن 
3-تم و ضع هذا الموضوع فى المنتدى العام و ليس التعليمى ..لآنة لا يحتوى على نظريات او ثوابت انما هى مجرد خبرات شخصية لا تتطبق فى كل الاحوال و كل الظروف و لكن فى معظمها .

مراحل شراء السيارة المستعملة 

اولاً الخطوة الاولى : مرحلة الدراسة 
1-حدد نوع و ماركة العربية من حيث مناسبتها لآحتياجاتك و ميزانيتك وذلك بترتيب عوامل اختيار نوع العربية 
أ- هاتش باك ولا سيدان (بشنطة)
هل تحتاج لمساحات داخلية كبيرة -هل سفرياتك كتير و فيها شنط كبيرة 
ب-موتور كبير ولا صغير 
استخدامك اكتر جوة البلد ولا برة البلد فى سفريات ذات سرعات عالية و طويلة 
عنصر توفير البنزين مهم بالنسبالك ولا لا 
عدد الاشخاص اللى معاك فى العربية دايماً كتير ولا قليلين ولا فى معظم الاحوال لوحدك 
ج-اسعار قطع الغيار 
سعر قطع غيار غالى ... مع .. عمر افتراضى كبير ....(ممتاز - بس على حسب ميزانيتك )
سعر قطع غيار رخيص ... مع .. عمر افتراضى قليل ....(جيد - بالنسبة لميزانيتك لآن العربية مش هاتقف عشان قطعة غيار او اكسسوار مطلوبة )
سعر قطع غيار غالى ... مع .. عمر افتراضى قليل ....(سيىء)
د- قطع الغيار متوفرة فى التوكيل و خارج التوكيل يبقى عظيم 

و-اماكن الصيانة 
- شغل توكيلات فقط (مكلف -مريح- لا يستغرق وقت طويل )
-معظم الميكانيكية بيفهموا فيها (ممتاز)
-لها ناس معينة (تبقى تعرفهم الاول )

بعد الخطوة دى هاتبقى حددت و عرفت 
ماركة العربية -نوع العربية- الموتور -شغل العربية بيبقى فين و اسعارة اية 

ثانياً الخطوة الثانية : مرحلة التحديد
يجب ان تحدد موديل العربية (السنة ) اللى انت عايز تشتريها و ذلك من خلال 
أ- ما هى افضل الموديلات لهذا النوع - يعنى سنة كام كان من افضل الموديلات اللى نزلت فى النوع دة 
ب-معرفة السعر المتوسط لهذا الموديل (السنة ) من خلال متابعة الاعلانات و الاتصال المباشر و السوق
ج- هل الموديل دة متناسب فى متوسط سعرة مع ميزانيتك ولا لأ ..لو كان اعلى أنزل للسنة اللى قبلية و هكذا 
د-تنزل السوق مرة (ليس للشراء ابداً) و لكن للفرجة و معرفة أخر سعر للموديل دة بعد شوية فصال صغيرين (وعلى كدة تحدد المتوسط السعرى الفعال لهذا الموديل ) يعنى مش مجرد كلام اعلانات 


بعد الخطوة دى هاتبقى حددت و عرفت 
موديل العربية (السنة ) بالظبط اللى عايز تشتريها و كمان متوسط السعر اللى فى السوق للموديل دة 

ثالثاً الخطوة الثالثة : مرحلة النزول للشراء 
عربيات تستحق النزول إذا كانت فى اعلان او الفرجة اذا كانت فى السوق 
1- الحالة 
-فابريقة (دهان مصنع).... بالكامل.... (ممتاز)
-فابريقة داخل فقط (تحت سنة 2000 ) .....(جيد)
-لا يوجد اى دهان فابريقة فى اى سنة (يعنى راشة برة و جوة ) ....... (سىء)
2-السعر 
-اعلى من المتوسط اللى انت طلعتة ........(ممتاز)
-فى المتوسط اللى انت طلعتة ........(جيد)
-اقل من المتوسط اللى انت طلعتة ........(سىء)
3-الكماليات 
هى الكماليات المتعارف عليها فى هذا الموديل من هذة السنة ولا يحبذ اى اضافات اخرى 
4-الموتور 
هو السعة اللترية (ال cc ) المتعارف علية فى هذا الموديل من هذة السنة 
5-اللون
من الالوان اللى كانت متواجدة فى هذا الموديل من هذة السنة 
يعنى مفيش 128 فى اوائل التسعينات فضى او 127 ذهبى ولا لانسر موف ..مثلاً 
6-الرخصة 
أ- رخصة أة بس بشروط
بأسم المالك ومش المهم فيها أد اية المهم طالعة لمدة اد اية 
3 سنين .... (ممتاز)
سنة واحدة ...(واحنا دلوقتى فى اخرها ).... (جيد)
سنة واحدة ...(واحنا دلوقتى فى اولها ).... (غير جيد)
ب-توكيل .....(سىء)
7-عدد الكيلو مترات 
يكون متناسب مع عمر العربية بمتوسط من 17 الف كم الى 20 الف كم فى السنة الواحدة 
عدد كيلومترات مظبوط مع المعدل المذكور ........(ممتاز)
عدد كيلومترات اقل مع المعدل المذكور ........(جيد)
عدد كيلومترات اقل بكتير من المعدل المذكور ........(غير جيد)
عدد كيلومترات اكبر من المعدل المذكور ........(سىء)

بعد الخطوة دى هاتكون قررت تنزل ولا لأ عشان تشوف العربية دى او قررت تتفرج عليها و تفحصها 

رابعاً الخطوة الرابعة : مرحلة فحص العربية للشراء 

من الخارج : خد لفة حوالين العربية ولاحظ الاتى 

1-طلاء السيارة 
-طلاء السيارة متناسب مع العمر للموديل ولا يوجد اى اجزاء لامعة اكثر من التانية 
2-ملاحظة الخدوش الاحتكاكات 
-وجودها فوق سنة 2000 (جيد)
-عدم وجودها فوق سنة 2000 (غير جيد)
-عدم وجودها تحت سنة 2000 (سىء)
3-الصدمات و الحوادث
ملاحظة اى فوارق بين الخطوط -بين الفوانيس و الرفارف-بين الباب و الحلق بتاعة -بين باب الشنطة و حلق الشنطة -بين الزوايا فى اركان العربية -طبقات عالية شوية فى الدهان عن الباقى -فوارق بين الاكصدام و جسم العربية 
4-الزجاج 
اى فوارق بين كاوتش الزجاج و الحلق اللى بيركب فية -كاوتش الزجاج جديد و اسود ولا قديم من عمر العربية -فى كتابة على اسفل الزجاج (اصلى ولا اتغير) -نقر متسابة (يبقى احسن) ولا كلة مية واحدة و بيلمع (قلق) -فى زجاج الابواب سيف الزجاج اللى فى الباب بالعرض قافل على الزجاج ولا مفارق (يبقى اتفك قبل كدة )-الزجاج لابس فى المجرى بتاعتة ولا مفارق 
5-الاكسسوارات 
المرايات -الشبكة الامامية -الفوانيس -الاشارات-المساحات-الأريال -فبر الاكصدام
كلها طبيعية للموديل دة ولا فيها افتكاسات فتسيبك منها احسن 
6-الكاوتش 
مناسب لعمر العربية .....(ممتاز)
تفاصيلة ممسوحة شوية بالنسبة لعمر العربية .....(جيد)
تفاصيلة بارزة وواضحة وشكلة لسة جديد .....(غير جيد)
تفاصيلةممسوحة اوى وشكلة قديم .....(سىء) وتخصم تمنة من سعر العربية فى متوسط الفين ج
7-الفوانيس 
نضيفة و شفافة .......(ممتاز)
متناسبة مع عمر العربية...... (جيد)
مغببة و مشبرة ..........(سىء)
8-السقف 
نفس درجة و لون العربية كلها ......(ممتاز)
اسواء من العربية بوجة عام ........(جيد)
احسن من العربية بوجة عام ........(غير جيد)
غير مستوى و فية اى التواءات ....(سىء)
9-العتب 
دة الجزء اللى تحت الابواب ... حط ايدك تحتية و خد سحبة كدة بطول العربية 
سليم و مستوى .......(ممتاز)
فية حتت متاكلة و اماكن محببة كدة ( سىء) علامة صداء (برومة موجودة اسفل العربية )
10-الكارتيرات 
دة الجزء اعلى العجل و اللى لافف حوالين الكاوتش من فوق .. ملاحظة عدم وجود اى اثر 
صدأ(برومة)-حتت متاكلة -أثر لحامات -اى التواءات -اثر لحاجة زى الزيت منشعة فى المنطقة دى 
11-المساعدين 
وقوف السيارة كلها على خط افقى واحد (يعنى مفيش جهة اعلى من التانية لا ورا ولا قدام)
غند الضغط على ركن من اركان العربية بتطلع تانى لفوق بنعومة و ثبات (غير متقطع فى الطلوع )
عدم وجود اى اثر لزيت او تنضيف حديث ليهم ( بيبقوا فوق العجل و ماسكين العجل بالعربية على شكل عمود رفيع رأسى )
14- نظرة بسيطة على اسفل السيارة 
عدم وجود اى اثر لأنخفاضات او ألتواءات 
عدم وجود صداء (برومة )
عدم وجود اى اثار لزيوت او شحومات قديمة 
علبة الشكمان سليمة و مش مصدية و مفهاش لحا مات و خصوصاً فى المناطق الضيقة اللى بتوصل جزء للآخر 

من الداخل : بعد ما خدت لفة حوالين العربية ... افتح الباب و ادخل عشان تقعد فيها ..بس سيب الباب مفتوح و انت بتقعد 
لو لاحظت ان سفل ضلفة الباب بينزل لتحت (بيقرب من الارض ) كتير وانت بتقعد فى العربية يبقى العفشة ضعيفة و المساعدين تعبانين ... 
-لاحظ كاوتش الباب و حالتة 
-لاحظ حلق الباب كلة (اى صداء -خبطات -لحامات -التواءات ) 
-لاحظ القايم (على يمينك اللى واصل بين اسفل العربية و السقف )
اى التواءات -اثر لحام قديم -فوارق بينة و بين السقف ......علامة سيئة جداً
خلاص اقفل الباب و خش العربية اقعد فيها
-فرش الصالون 
وجود فرش اضافى ...... (غير جيد) شيلة و بص تحتية 
الفرش الاصلى متناسب مع عمر العربية .......(ممتاز)
الفرش الاصلى اقل من عمر العربية مع وجود فرش اضافى .......(جيد)
الفرش الاصلى وحش و متبهدل .......(سىء)
-فبر التابلوة 
فبر التابلوة متناسب مع عمر العربية (ممتاز)
فبر التابلوة بيلمع...... (غير جيد)
فبر التابلوة وحش و مشقق (سىء)

-فرش الصالون ..اى اثر لخياطات او ترقيعات او حتت متاكلة و شوف الدواسات و فرش الابواب و الحالة العامة لكل التنجيد الداخلى و مقايستة بعمر العربية ومناسبتة لنمط شخصية البائع 
-السقف الداخلى ..ملاحظة اى فوارق او هبوطات او اثار فك و تركيب فى كل السقف و التقائة بالجوانب اللى شاية السقف كلة 
-الدواسات اصلية ولا لأ و هل فى تحتها اى تأكلات او اثار لآحتكاكات مستديمة 
-الجزء اسفل التابلوة 
متقفل كويس و علية تراب ....( ممتاز)
متقفل كويس ....( جيد)
مفارق و فية اثار فك و تركيب ....( سىء)
مفتوح و فية اسلاك واضحة ......(سىء جداً) مؤشر لحالة الكهربا العامة فى العربية 
-لوحة العدادات 
اى فوارق بين الزجاج بتع العدادات و التابلوة .....(سىء)
-درج التابلوة 
نضيف و متقفل من اخرة كويس ....(ممتاز)
مليان حاجات و مكركب ....(غير جيد)
ضهرة واقع و متبهدل من جوة ...(سىء)
-فرامل اليد ..... وانت قاعد جوة العربية شد فرامل اليد للآخر ولاحظ الاتى 
فرامل اليد بتتطلع بصعوبة وبتقف ببطىء فى الاخر ......(ممتاز)
فرامل اليد بتتطلعبراحة و بتصد فى الاخر بنعومة (غير جيد)
فرامل اليد بتتطلع مرة واحد بسهولة و بتصد فى الاخر مرة واحدة (سىء)

انزل من العربية وروح شوف الشنطة
افتح الشنطة ولاحظ بتتطلع لفوق ازاى (بسهولة بتترفع لوحدها -بصعوبة -بتقع تانى )
شيل فرش الشنطة و بص تحت الفرش 
لاحظ اى .. صداء (برومة -انخفاضات -اثر لحامات -شحومات -زيوت) كل دى علامات سيئة 
بص على اركان الشنطة اللى خلف الفوانيس الورانية 
لاحظ اى اثار لفك و تركيب -اسلاك بارزة -خبطات (مسمعة جوة ) 
شوف حالة الاستبن 
استبن اصلى ......(ممتاز) ساعات بيبقى اصغر من كاوتش العربية العادى (بعض العربيات )
استبن بحالة كويسة .....(ممتاز)
استبن حالتة اسواء من حالات الكاوتش اللى متركب فى العربية ......( سىء)

حالة الموتور :
تعالا قدام الكابوت ..افتحة ..
1-اللون و الشكل 
ملاحظة لون داخل الموتور (حوض الموتور) نفس لون العربية ولا لآ 
-نفس لون و درجة العربية ...(ممتاز)
-اقل من درجة لون العربية (فى اللمعان )....(جيد)
-متبهدل كتير عن العربية ...(سىء)
2-الحالة العامة
ملاحظة الاركان الجانبية فوق و تحت -الوصلات -عدم وجود اى اثار نشع زيت فوق و تحت -
مستوى السوائل فى مختلف العلب -عدم وجود اى اثار لحامات او شروخ او تغطيات -البطارية عليها شحم او املاح (بيضاء) - السيور ناعمة و مش ناشفة ولا مشققة -عناصر تركيب الفوانيس من ورا ثابتة و مش مفكوكة قبل كدة -علبة الريداتير مش مصدية -وش الموتور (السدر) من الناحية المتصلة بالكابينة العزل فيها ماسك نفسة و مش واقع و مفيش اجزاء مصدية الاجزاء فوق العجل(العلب) مفيش فيها لحامات ولونها ذى الباقى -الخط العرضى اعلى حوض الموتور مستوى و افقى

اطلب من البائع يدور العربية و انت واقف قدام الموتور ولاحظ الاتى
-فى صوت قفشة فى التدوير ولا دارت بنعومة 
-صوت الموتور نغمة واحدة ولا فيها تقطيعة او ذبذبة 
-فى صوت ورة او صفارة صغيرة 
-اطلب منة يزود بنزين و شوف .. الصوت بيعلى على وتيرة واحدة ولا بيقطع و فى اصوات تانية دخات فى الموضوع 
ابعد عن العربية فى اتجاة عمودى ...وشوف فى اى دخان او بخار طالع مهما كان مش ملحوظ فى زغلله و (ظاهرة السراب) يعنى حرارة طالعة اعلى الموتور ولا لأ
ارجع تانى للعربية ..شامم اى ريحة 
شوف مروحة الرياتير اشتغلت ولا لسة 
حط ايدك على الريداتير ... تستحمل تحط ايدك ثانية واحدة ولا بقى سخن و مولع جداً
اطلب من صاحب العربية يلف الدركسيون للآخر مرة يمين ومرة شمال
-ما سمعتش اى صوت و انت واقف فوق الموتور ...(ممتاز)
-سمعت صوت طقطقة او صفارة خفيفة اوى ........(سىء)

ارجع ورا العربية و حط ايدك قدام فتحة الشكمان
سد بأيدك فتحة الشكمان لمدة ثانية واحدة ..لقيت ممانعة و قوة بتبعد ايدك جامد يبقى...( ممتاز)
....شيل ايدك و بص فيها 
ايدك نضيفة و معلهاش اى حاجة ..(ممتاز)
مفيش اى حاجة بس فى اى حاجة ولو بسيطة بتطلع من الشكمان سواء (مياة -رزاز-نقط سوداء -دخان بسيط) .....(غير جيد)
فى اى اثار لنقط سوداء على ايدك ...(سىء)
ادخل جوة العربية تانى
لاحظ الاتى 
1-لف الدركسيون... ذى ما كنت واقف امام العربية فاكر (اى تقطيع فى اللفة -تكات -صوت-)..(سىء)
2-جرب الزجاج الكهربا فوق و تحت الاربعة 
3-بص على مؤشر الحرارة 
ثابت فى النص...(ممتاز)
بيشاور عقلة لقدام (سىء)
4-بص على لوحة العدادات 
ال RPM مفروض يبقى بين 800 و 900 فى الطبيعى 
5-شغل التكييف على البارد على اقصى درجة 
ال Rpm هايعلى سنة لفوق ..دة كويس ...حط ايدك على فتحات التكييف ..بتطلع هواء بارد جداً و مستمر لفترة دقيقة لديقتين يبقى كويس 
-ال RPm و التكييف شغال ثابت .....(ممتاز)
-ال RPm بيترعش و يطلع و ينزل .....(سىء)
5-شامم اى ريحة حاسس بأى صوت خفيف ...مفيش .. يبقى تمام 
6-اطفى التكييف و خليك قافل الزجاج 3 او 5 ثوانى 
-درجة الحرارة ما رحتش بسرعة ....(ممتاز)
-درجة فرقت وراحت بسرعة ....(سىء)

------------------------------------------------------
لحظة اتخاذ القرار 
جمع كل النقاط السلبية و سيبك من اى عناصر ايجابية 
لقيت عددها قليل ودرجة اهميتها بسيطة ....(يبقى هاتشترى العربية دى )
لقيت عددها مساوى او اكتر و درجة اهميتها عالية ....(يبقى سيبك من العربية دى )

افتح الباب و انت نازل من العربية واخد قرارك أة ولا لأ (مهما حصل بعد كدة مايفرقش معاك)
------------------------------------------------------

انزل و اتكلم مع البائع فى تمن العربية و فاصل و اذكر كل مدة احدى السلبيات اللى جمعتها فى دماغك (مش مرة واحدة) وحاول توصل معاة لآحسن سعر ممكن (بدون غتاتة طبعاً)



وتمنياتى بالتوفيق لكل اللى ناوى ينزل يجيب عربية مستعملة و معتمد على نفسة 
ويارب يلاقى العربية اللى يتمناها و تسعدة 
ويارب ربنا يديلة كل خيرها و يكفية كل شرها

و الف مبروك مقدماً


=============

بالنسبة لموضوع الرخصة و الملكية و انت بتسأل عليها ..ليها انطبعات معينة ممكن تستنتجها ...(طبعاً مش قاعدة ولكن بتكون صحيحة فى معظم الاحوال)

-رخصه 3 سنوات ...(ممتاز) يعنى الراجل كان مرخص تلات سنين ..ودة معناة 
1-ماكنش فى نيتة البيع (يعنى مش جايب العربية ) عشان يبعها وخلاص
2- بيحب عربيتة و مكمل بيها فترة كبيرة لسة جاية ودة معناة انها قليلة المشاكل 
3-ممكن يكون عامل شغل فى العربية للحاجات ذات الفترة الكبيرة (مساعدين-كبالن-اسطوانة -طرمبات) ويبقى انت كدة كسبت مكونات لسة ادامها فترة طويلة لما تتغير ... ولو مش عامل دول على الاقل مهوماش عاملين مشكلة حالين لآنة كان ماشى بيها عادى .


- رخصة سنة واحدة ...(واحنا دلوقتى فى اخرها ).... (جيد) ممكن يكون عايز ينقل لعربية اكبر ودة معناة انة استنى لآخر الرخصة لما تقرب تنتهى .. وبكدة تكون العربية كانت بلا مشاكل على الاقل لآنة كمل بيها لغاية ما الرخصة قربت تنتهى .


-سنة واحدة ...(واحنا دلوقتى فى اولها ).... (غير جيد) ممكن يكون نقل ملكية ورخص لمجرد 
(بيع العربية فقط) ودة معناة ان العربية ممكن يظهر فيها اى شغل محتمل و هو حتى مايعرفش حاجة عنة 


-توكيل ... (سيىء) لآن معظم التوكيلات اصحابها مجرد بيتاجروا فى العربية و العربية فيها شغل محتاجاة من اول ما ربنا خلقها .. ومحدش عملة .