من وحي الحياة :


& أوعي تبهرك فكرة المساواة و تقارني نفسك بالراجل و تقولي مين أفضل ومين أهم لأن مفيش وجه مقارنة ( يعني زي الليل و النهار حاجتين غير قابلين للمقارنة ) أحنا مش شبه بعض و ربنا لو عايزنا واحد مكانش خلقنا أتنين كل واحد جاي الدنيا لدور معين ...

& أوعي تقبلي أي جوازة وسلام عشان كلام الناس عن العنوسة لو مش حاسة أن اللي جايلك ده حيضفلك متوافقيش لو مش حاسة أن الجواز حينقلك لحال أفضل و تبقي مبسوطة أكتر متتجوزيش ...


& أوعي تصدقيهم لما يقولوا ضل راجل ولا ضل حيطة ! عشان ساعات الحيطة بتبقي أفيد عالأقل ممكن تتحامي فيها لكن في رجالة تجبرك أنك تتحامي منها ..


& أوعي تضطري تحولي نفسك لسلعة في سوق الرجالة فتتعري و تتمايعي و تنزلي تعرضي نفسك عشان تعجبيهم وتدخلي في أكتر من علاقة و تخرجي منها مقهورة بحجة أن مفيش عرسان ( الجواز نصيب علي فكرة مش كده خالص ) ...


& أوعي تستسلمي لإنهزامية المجتمع و نظرته الدونية للست و تعتبري نفسك أداة في أيد الراجل أنتِ النبي وصي عليكِ و سمي اللي بيهينك لئيم العيب فيهم مش فيكِ ...


& أوعي تسمحي لحد يلغي شخصيتك و يرسملك حياتك بخط أيده أنتِ اللي حتعيشي حياتك و أنتِ اللي تقرري شكلها و لو صح ليكِ و لو غلط عليكِ خليكِ أد قراراتك ...


& أنجحي و أفرحي و أفتخري و أحلمي أنتٍ أد أحلامك أنتِ الأم اللي بتربي الراجل و تعلمه الأدب أساساً .. فلتحيا تاء التأنيث :))