الشائع بين الناس أن أسهل فئة ممكن تتعلم لغة جديدة وتتعلم كل حاجة بسهوله هم الأطفال بس مش معنى كدة اننا مش هنحاول ونعافر أحنا كمان , بالرغم أني ديماً كل ما احاول أتعلم لغة جديدة أدخل بحماسة تامة وأبدء وبعد كدة أتوقف أو المشكلة كمان أنك ممكن تتعلم ومتعرفش تمارس لان مفيش حد تتكلم معاه ,وعشان ديه مشاكل كانت بتواجهني في تعلم لغة جديدة بحث وحبيت أشارككم علي كن رائد بـ7 حلول رائعة جداً لتعلم لغة جديدة والإستمرار .

إزاي تتعلم لغة جديدة بسهولة ؟

النصائح ديه تم تجميعها من عدة أشخاص محترفه جداً بعد ما طلبنا من بعض المترجمين فى TEDx انهم يشاركونا اسرارهم لاحتراف اي لغة اجنبية .

1- كن واقعياً

ده بالظبط الي اتقال من مستر جوديث ماتز المترجم الالماني ,موضحاً انك لازم تكون عارف قدر نفسك كويس وأستعابك ومتعملش Overload علي نفسك لأن كدة كدة الموضوع في الاول بيكون متعب وشاق علي الواحد ,ونصح كمان بإنك ممكن تتبع أستراتيجية الـ 50 في تعلم اللغة بمعني أنك تختار 50 كلمة وتتعلمهم أول باول لحد ما يكون عندك حصيلة مميزة من الكلمات للغة الي عاوز تتعلمها,وبعد ما تخلص كم كافي من الكلمات تقدر تفكر انك تدخل في القواعد  .

2- أيه الي جد في حياتك ؟

ديماً اسأل نفسك السؤال ده ولو لقيت أن حياتك ي ما هي ومفيش جديد أعرف أنك بتتعلم غلط , لان لازم تعلم اللغة يأثر علي حياتك وتأثير إيجابي كمان ,وده الي قالته اليزابيث بوفارد ( معلمة لغة انجليزية خبيرة بإجمالي  27 سنة ) ,وركزت كمان من خلال كلامها أن الفرق بين الناجح والفاشل في تعلم اللغة هو الإستمرارية الثبات وده بينتج عن الإرادة طول ما عندك إرادة طول ما بأذن الله هتستمر وتنجح.

3- أعرف لغتك وعلم عليها 

أيوه بالظبط كدة زي المثل المصري ( أعرف صاحبك وعلم عليه ) النهاردة بقي بقولك كدة بس علي  اللغة الي عاوز تتعلمها , صاحب اللغة و أتعود عليها حاول ديماً تخليك معاها أتكلم بيها وحرك لسانك , وجهز دماغك وهي نفسك ان اللغة ديه حاجة مفيدة وهتنفعك في مستقبلك , وده الي قالتوا المترجمة الروسية أولجا دميتروشينكوفا " استغل كل فرصة متاحة انك تستعمل اللغة الجديدة " أخلق مجتمعك الخاص سمي الحاجاة بأسامي اللغة الجديدة وأتعامل بيها كدة , وأفضل طريقة من وجه نظري عشان متنساش اللغة أقرء قصص أطفال واتفرج علي فيديوهات كتير .

4- التكنولوجيا مش كلها فيسبوك

أيوه بالظبط كدة يعني حضرتك مش طول ما انت قاعد تقديها علي الفيس بوك أعمل حاجة مفيدة شويه بس اقولك أيه كتير قولنا الكلام ده ومطبقناش ومش هنطبق ^^ , لكن عندي حل عشان نتعلم أفضل لو أخترت لغة تتعلمها مثلاً اللغة الروسية أقلب كل حاجة روسي ( لغة الموبايل , لغة الفيسبوك , لغة الكومبيوتر ... الخ ) هتلاحظ فرق كبير وهتبدء تتعلم أفضل وبالنسبة للنصيحة فالمترجمة الهولندية ايلز دي كيسر بتنصح انك تستعمل ( تطبيق دوولينجو) للتعرف على قواعد اللغة الي بتتعلمها .

5-عيش التجربه صح وتمتع بيها

سيباستين بيتي المترجم الأسباني قال تعلم اللغة بيتمحور حولين مجموعة الفرص والخبرات الي أنت بتكتسبها من تعليمها ومدي تمتعك بها لانك كل ما كنت مستمتع كل ما هتستمر اكثر في المزيد من التعلم ,فكر في كل الحاجات الممتعة اللي بتحب تعملها و اربطها بتعلم اللغة الجديدة , على سبيل المثال المترجمة انا مينولي اتعلمت الانجليزية عن طريق مشاهدتها لنسخ غير مترجمة من افلامها المفضلة , في حين ان المترجم الكرواتي ايفان ستامينكوفيتش اكتشف فجأة انه يقدر يتكلم انجليزي في الصف الخامس بعد سنين من مشاهدته لقناة كارتون غير مترجمة , الخلاصة , حاول انك تربط اي حاجة بتحب تعملها باللغة اللي بتتعلمها

6- أخلق مجتمعك اللغوي الخاص

دور على الانترنت على مواقع تبادل لغوي , هتلاقي ناس يساعدوك تحسن لغتك و انت هتساعدهم يحسنوا لغتهم , أو حتي في الفيس بوك دول علي ناس اجانب وتواصل معاهم تعرف عليهم و أعمل علاقات ويا سلام بقي لو أنت عايش في دولة ساحليه او سياحية وبيجي عندك سياح أقفش فيهم متسبهمش مفيش احسن من أنك تتعلم من Native .

7- أغلط براحتك متعدش يا جيمي

وأنت بتتكلم مع حد أجنبي اوعي تخاف من أنك تغلط أبداً علي فكرة عن تجربة من أكثر من حد أصحاب اللغة الاصليين لو شافوا انك بتحاول تتواصل معاهم بلغتهم هيقدروا ده جدا و هيساعدوك ,جرب تبدأ محادثات مع الاصغر سنا , المترجم الالماني جوديث ماتز بيقول انه اتصدم لما اتكلم مع طفل ايطالي و اكتشف انهم تقريبا في نفس المستوى في اللغة , و لازم تكون صبور , لانه كل ما اتكلمت اكتر كل ما تقرب من انك تكون طليق اللسان في اللغة و تبدأ محادثات مع ناس من نفس عمرك أن شاء الله .

في النهاية بفكرك ان تعليم أي لغة جديدة محتاج إرادة قوية ومصادر أقوي تابعني الفترة الجاية بأذن الله عشان هنشرلكم كورسات مجانية ومصادر تعليمية قوية جداً في أكثر من مجال ,ولو محتاج تتعلم لغة معينة أبحث عنها في بحث كن رائد أو أكتب تعليق .
وتذكر حلمك في التميز والنجاح ,وكن كلك يقين أنه 
لن يُهدم ‫#‏حُلمٌ‬، كان صاحبُه يظنُ ‫#‏باللهِ‬ خيرًا ♥