البرامج الدينية من الحاجات الاساسية اللي بنستناها من رمضان لرمضان عشان نتابعها وزي كل رمضان بيكون غني بالبرامج الدينية السنة دي كمان في مجموعة من البرامج اللي هتكون معانا لمختلف الشيوخ والدعاه زي الداعية احمد الشقيري, ومصطفى حسني, وعمرو خالد, والشيخ محمد العريفي, والشيخ سلمان العوده وغيرهم, النهاردة جيبنالكم ابرز البرامج الدينية لرمضان 2016 والقنوات اللي هتتعرض عليها عشان تقدروا تتابعوها.

تعالوا نشوف مع بعض البرامج الدينية لرمضان 2016:

1- برنامج فن الحياة:

وزي كل سنة معانا الداعية مصطفى حسني ببرنامج فن الحياة, ومصطفى حسني من الدعاه الشباب المميزين جدا اللي ليه كتير من المتابعين اللي بيحبوا يتابعوا البرامج بتاعته كل سنة, والبرنامج هيتم عرضه على قناة النهار, وقناة اقرأ.




2- برنامج قُمرة:

برنامج قُمرة للداعية احمد الشقيري هو برنامج جديد بعد انتهاء سلسلة حلقات برنامجه خواطر اللي كان بيقدمه خلال السنين اللي فاتت لمدة 11 سنة وكان بيدعو فيه لتنمية الافراد والسلوكيات والاخلاق وتنمية المجتمع, السنة دي البرنامج مختلف وفكرته جديدة وهيكون بمشاركة المشاهدين في انهم يصوروا فيديوهات عن مواضيع هادفة ومهمة وارسالها للبرنامج وهيتم عرضها والهدف منه هو زيادة واثراء الاعلام الهادف, وافضل الفيديوهات اللي هتتعرض اصحابها هياخدوا جوايز مالية من البرنامج يعني هيكون عبارة عن مسابقة وبرنامج في نفس الوقت, هيتعرض على قناة ال MBC.




3- برنامج الايمان والعصر الجزء التاني:

الداعية عمرو خالد هيكون معانا السنة بالجزء التاني من برنامج الايمان والعصر اللي اتعرض الجزء الاول منه في رمضان 2015, والبرنامج توعية عن مفهوم الدين الحقيقي في حياتنا وهيناقش موضوعات وقضايا كتير من الناس دايما بيسألوا عليها, والبرنامج هيتعرض على قناة ال MBC.




4- برنامج ايها المريد:

وهيطل علينا السنة دي الداعية اليمني الحبيب على الجفري ببرنامج ايها المريد, والحبيب علي الجفري صرح انه البرنامج متصور كله في الشيشان وانه هيكون مختلف في الشكل والمضمون عن معظم البرامج الدينية, وهيتعرض على قناة ال CBC.




5- 4 برامج للشيخ سلمان العودة:

الشيخ سلمان العودة هيكون موجود معانا في رمضان السنة دي من خلال 4 برامج هما برنامج نور واتصور مع عدد من المكفوفين من الاطفال والشباب في السودان واللي من خلال البرنامج هيتعمل لهم عمليات اعادة بصر, والبرنامج هيتعرض على قناة وطن, وسواعد الاخاء الجزء الرابع ومشترك فيه مع مجموعة من الدعاه والشيوخ والبرنامج اتصور في تركيا, والبرنامج هيتعرض على قناة بداية, وبرنامج قلب واحد واتصور مع اللاجئين السوريين على الحدود السورية التركية, وهيتعرض على قناة الريان القطريه, وبرنامج رابع يعتبر من فئة تليفزيون الواقع لكن لسه متحددش اسمه وهيتعرض على قناة المجد بعد صلاة التراويح.


6- برنامج العالم الاخير:

برنامج العالم الاخير هيقدمة الشيخ محمد العريفي, والبرنامج كله اتصور في تركيا في مغارة تحت الارض ب 27 متر, وهيتعرض على قناة المجد.





7- برنامج كن نجما:

برنامج هيقدمه الدكتور طارق السويدان, هيتعرض على قناة يمن شباب.