فيه 3 حاجات مهمه جدًا لأى حد عايز يقفل بيعه أو يحقق تارجت فى المبيعات أو يتقن فن البيع باعتبارى بدأت حياتى من المبيعات :)

أولًا أن يكون متحمس جدًا :-

حماسك فى المكالمة أو لما بتقابل عميل بيدى العميل إحساس إنك ناجح ومقتنع بمنتجك وبتحبه ودى نقطة مهمة جدًا تخليه ممكن يقفل معاك الديل .... حماس حقيقي غير مصطنع ... الناس عمومًا بيحبوا الناجحين والمتحمسين وبيحبوا يعملوا معاهم بيزنس مبيحبوش المحبطين والمكتئبين والكارهين للحياة واللى بيشتكوا دايمًا من ظروفهم .


ثانيًا إنك تكون حاد وقاطع :-

كتير من اللى بيشتغلوا فى المبيعات بيفتكروا انهم لما يتكلموا كتير كده بيقربوا بينهم وبين العميل ... وده غالبًا بيجيب نتيجة عكسية ... الناس بتحب اللى بيجيب من الآخر يعنى يدخل فى صلب الموضوع مباشرة لأن الرغى بيدينى انطباع إنك عندك وقت كتير ومش لاقى غيرى تبعله وفاضى وعايز تضيعللى وقتى فغالبًا هحاول أخلص المكالمة أو المقابلة بسرعة وهقعد أقولك ممم حاضر وانتهينا ....

حاول تفهم إن العميل عايز ما قل ودل وفى الآخر يا هشتري يا لأ .... الواحد بيشوف بياعيين بيوصل بيهم الرغي إنى أروح أشترى حاجة معينة ومعايا الفلوس ورايح أخلص ألاقيه يقعد يشرح فى مميزات وبعدين ممكن فى النص يقول حاجة متعجبنيش أقوم مكملش .... وأحيانًا يحاول من باب انه بيحط التاتش إنه يخلينى أشترى حاجة تانية أغلى مثلاً فبرضه لا أشترى دى ولا دى ... ياريت نختصر ونبطل مقدمات طويلة ومملة وحاجات كتيرة والبياع بيقولها زى الاسطوانة اللى بتتكرر ومحدش عنده وقت يسمعها :)


ثالثًا لازم تكون صاحب مسئولية وتفويض جوا الشركة ...

لو العميل وصله إحساس إنك مش مالى مركزك أو إنك ضعيف جوا شركتك غالبًا مش هيتشرى منك .... ولو كل شوية تسأله أنا هاسأل الإدارة وأرجعلك غالبًا هايقولك طيب ادينى الإدارة ولو رفضت برضه مش هايكمل معاك .... لو حس إنه ممكن ياخد خصم أو شروط أفضل مع حد أعلى منك جوا شركتك مش هايخلص معاك وممكن مايشتريش من شركتك خالص .... أى حد عايز دايمًا شخص مسئول وبيحترم أى شخص مسئول يتكلم معاه فلازم وانت بتكلمه تبقي فعلاً معاك كل الصلاحيات بتاع الشركة بتاعتك وفى نفس الوقت لازم تحسسه إنك واصل جوا شركتك وإنه مش هايقدر ياخد شروط أحسن
( وياريت يبقي كلام حقيقي مش غش )


أتمنى إنى أكون وصلت معلومة نستفيد منها وربنا يوفق الجميع والمرة اللى جاية هحكيلكوا على مواصفات البياع اللى خلانى أشترى عربية بى إم دبليو ^_^