غرائب :
كيف تدير بيزنس وقت الأزمات ؟؟؟ ( الحلقة الأولى )

- هنبدأ النهارده نتكلم عن كيفية إدارة البيزنس وقت الأزمات واللى هى موجودة في كل وقت مش مرتبطة ببلد أو بصناعه أو بفرد ... يعني ممكن البلد نفسها يبقي فيها أزمة وبتبقي على الكل أو البلد كويسة بس الصناعة اللي انت شغال فيها عندها مشاكل كتير جداً أو حتى البلد والصناعة بخير بس انت اللي عندك أزمة فى شغلك وفى إدارته .....

- لازم تعرف إن دى حاجة عادية جداً والشطارة إنك تدور إزاى تتغلب علي الأزمة مش بس كده وكمان إزاى تستغل الأزمة إنك تحقق مميزات إضافية (طبعاً بشكل قانوني وأخلاقي) والمقصود هنا الاستغلال بالمعني الإيجابى مش السلبى ...


طبعاً فيه آلاف الأمثلة اللى ممكن نتكلم عليها بس كلها بتبقى معتمدة على إن فيه ناس بتشتغل وقت ما السوق مزدهر وفيه منافسة شرسة وفيه ناس بتشتغل وقت ما فيه ركود وبيبقى مفيهوش منافسة أو المنافسة ضعيفة ...

- هقول مثال كلنا نعرفه وهو "توشيبا العربي" هتلاقى الإمبراطورية الرائعة دى بدأت سنة 1968 وده وقت كلنا عارفين صعبة الشغل فيه لدرجة إن الحاج محمود العربي كان بيضطر علشان يحول فلوس لليابان إنه يسافر لبنان يحول فلوس لأن مصر مكانشي فيها تحويلات خارجية في الوقت ده ....
- مثال تانى الناس اللى بدأت بيزنس تربية الدواجن أثناء أزمة "انفلونزا الخنازير" .... الناس دى سواء دخلت في البيزنس جديد أو كانت موجودة فى السوق وقررت تكمل لأن فيه ناس رفضت تكمل بعد الخسائر الضخمة الناتجة عن إعدام ملايين الفراخ تحسباً من انتشار المرض وأصبح فيه ندرة وغلى سعر الكيلو لثلاث أضعاف تمن التربية وده خلي المزارع الضخمة تعوض خسائرها الرهيبة خلال 18 شهر فقط .

- مثال تالت كان في أحد المواسم بعد الثورة كتير من منتجي الملابس خافوا ينتجوا لأنهم كانوا حاسين إن فيه أزمة كبيرة في السوق وفيه قلة من المصانع اللى أخدت الريسك إنها تنتج ولما جه العيد وطبيعي أياً كانت الأوضاع الإقتصادية والسياسية الناس بتشترى لبس جديد وخصوصاً للأطفال وفعلاً المصانع دى عملت أرباح كبيرة جداً لأنها اشتغلت بدون منافسة مش بس كده دى طلعت مخزون من الملابس اللي موضتها عدت أو كان ذوقها سيء وباعت كل الأنواع دى فى الموسم اللى كل الناس فكرت إنه موسم سىء ...

- الأمثلة كتير جداً وكلها بتعتمد علي مفهوم واحد وهو إن فيه ناس شافت في الأزمة فرصة كبيرة وأصرت تستغلها وفيه ناس شافت إن الأزمة دي تبرير للكسل والنوم والإهمال أو على الأكثر فرصة إننا نقف وقفة طويلة ونكمل لما السوق يشتغل تاني ... يعنى فيه ناس بتشتغل بغض النظر عن الظروف المحيطة وفيه ناس بتستسلم للسوق المحيطة وده الفرق بين الاتنين ...

- طيب اللى عايز ما يسلمش للظروف ويكمل شغل برغم ضغط الظروف يعمل إيه ؟؟؟؟
ده اللى هنكمل كلامنا فيه الحلقة اللى جاية إن شاء الله فتابعونا .. :) :)